Hátíðleiki á aðventu

Hátíðleiki aðventunnar verður hafður í öndvegi 
​á aðventutónleikunum 4. desember í Digraneskirkju

Hátíðleiki aðventu og jóla er ætíð hafður í öndvegi á aðventutónleikum Kvennakórs Garðabæjar en að þessu sinni verða þeir haldnir þriðjudaginn 4. desember í Digraneskirkju. Áheyrendahópur Kvennakórs Garðabæjar hefur farið sístækkandi með hverju árinu. Tónleikar kórsins eru orðnir ómissandi þáttur í menningarupplifun margra Garðbæinga og annarra velunnara kórsins. 

Tónleikamiðarnir seldust upp á mettíma

Það hefur þó aldrei gerst áður að miðar hafi selst upp á mettíma eða um miðjan nóvember eins og gerðist nú. Það er auðvitað sérlega ánægjulegt en á móti leitt að geta ekki tryggt öllum fylgjendum kórsins miða. Það er því ljóst að á næsta ári þarf kórinn að huga að stærra tónleikahúsnæði eða halda tvenna tónleika. Draumurinn um að syngja í heimabæ í glæsilegu menningarhúsi rætist vonandi sem allra fyrst.
Á aðventunni mun kórinn syngja fyrir gesti og gangandi við hin ýmsu tækifæri, meðal annars í verslun IKEA og á hjúkrunarheimilum. ​Með ósk um notalega aðventu og gleði og frið á jólum.